Ресми статистикаға сүйенсек, ШҚО-ға биылғы бірінші тоқсанда 65 мыңнан астам турист келіп қайтқан. Бұл өткен жылдың сәйкес кезеңімен салыстырғанда, 45 пайызға көп.

Қай заманда да тұмса табиғатымен ерекшеленген Шығыс өңірі үшін 65 мың турист – бұл тым аз. Мұны облыс әкімдігінде өткен алқалы жиын барысында аймақ басшысы Ермек Көшербаев та айтты, деп хабарлайды Altaуnews.kz сайты Didar ақпаратқа сілтеме жасап.

Облыс әкімдігінің кезекті отырысында өңірдегі туризм саласын дамыту мәселелері де қаралған болатын. Аталмыш тақырыпқа қатысты баяндама жасаған кәсіпкерлік және индустриялық-инновациялық даму басқармасының басшысы Елдос Байрахметов туризм саласына қатысты оң динамика байқалатынын мәлім етті.

Оның айтуынша, кәсіпкерлік басқармасы құзырлы мемлекеттік органдармен бірлесіп Алтай, Катонқарағай, Самар аудандарында және Риддер қаласында туризмді дамыту жөніндегі іс-шаралар жоспарын әзірлеген. Оған жол инфрақұрылымын жақсарту, туристік тұрғыда тартымды елді мекендерді абаттандыру, демалыс аймақтарында өрт қауіпсіздігін күшейту сияқты іс-шаралар кіреді екен. Енді мамандар мұндай жұмыстарды өзге аудандарда да қолға алып, артынан бірыңғай құжат әзірлеуді ұсынуда.

Сонымен қатар басқарма басшысы келіп-кететін туристер санын анықтап, нақтылау үшін ұялы байланыс операторларымен бірлескен талдау жұмыстарын жүргізу керектігін айтты. Негізгі туристік бағыттарда санитариялық-гигиеналық тораптар салу, жол бойындағы дәретханаларды күтіп ұстау жұмыстарына субсидия бөлу сияқты ұсыныстар да айтылды.

Алайда облыс әкімі Ермек Көшербаевтың жоғарыда айтылған ұсыныстарға қатысты өз пікірі бар екен. Аймақ басшысы облыста бір орталыққа бола бөлек ғимарат салу негізсіз әрі тиімсіз екенін айтып, туризм саласын дамыту үшін су жаңа нысанда отыру міндет емес екенін жеткізді.

Аймақ басшысы құзырлы басқармалар аудан-қала әкімдерімен туризм мәселелеріне қатысты тығыз қарым-қатынаста жұмыс істеу керектігін айтып, осы жөнінде бірқатар тапсырма берді.