Мемлекет басшысы Қасым-Жомарт Кемелұлы Тоқаев ауылдық жердегі медицинаны дамытуға баса назар аударғаны мәлім. Ағымдағы жылдың басында медицина саласын дамытуға 460 млрд теңге жоспарланып, оның 40%-ы ауыл-аймақтарға бөлінетінін де хабарлаған болатынбыз.

Бұл ретте қазір республика көлемінде «Senim» Денсаулық сақтау жүйесі жұмыскерлерінің салалық кәсіптік одағы» республикалық қоғамдық бірлестігі жұмыс істейді. Ол - еліміздегі ең ірі салалық кәсіподақтардың бірі. Денсаулық сақтау ұйымдарының, ғылыми орталықтар, санаторий-курорттық және басқа да медициналық ұйымдардың қызметкерлерін, студенттер мен жоғары және орта кәсіптік білім беру мекемелерінің оқушыларын біріктіреді, деп хабарлайды Altaynews тілшісі.

Ал медицина қызметкерлері кәсіподағының ШҚО-дағы филиалы 2018 жылы құрылған. Бүгінде ол - өңірдегі ең жас кәсіптік одақ.

«Senim» кәсіподағының негізгі міндеті - жұмысшылардың құқығын қорғау, еңбек және демалыс жағдайларын жақсарту, жеке және ұжымдық дауларды шешу, медициналық қызметкерлердің мәртебесін арттыру.

Аталған мәселе алдағы уақытта облыс әкімінің басқаруымен өтетін отырыста талқыланбақ.