Кеше Зайсан қаласындағы бір қабатты қоғамдық монша ғимаратында жылыту қазандығы жарылып, салдарынан бір адам қаза тапты. Зардап шеккен тағы екі адам бар.

ШҚО әкімі Ермек Көшербаев бүгін қара жамылған отбасына көңіл айтып барды. Сондай-ақ ауруханадағы зардап шеккендердің жағдайын да біліп қайтты, деп хабарлайды Altaynews.kz тілшісі.

Зардап шеккендер бірден ауруханаға жеткізілген болатын. Бүгінгі таңда екеуі де Зайсан аудандық ауруханасында ем қабылдап жатыр.

Облыс әкімі Ермек Көшербаев ауруханаға барып, зардап шеккендердің қал-жағдайын біліп қайтты. Дәрігерлер екі науқастың да жағдайын қалыпты деп бағалап отыр.

Аймақ басшысы қаза болған кісінің үйіне де барып, отбасына көңіл айтты. Қаза болған – Серік Намазбаев есімді 41 жастағы азамат. Бұл көпбалалы отбасы екен. Балаларының кенжесі әлі бір жасқа да толмаған. Облыс әкімі отбасына мейлінше жан-жақты көмек көрсетілетінін айтты.