ШҚО-да малға арналған қысқы жем-шөп қоры жеткілікті мөлшерде әзірленді. Бүгінге дейін өңірде шамамен 1,5 млн тонна жем-шөп дайындалған. 
Атап айтсақ, шөп – 1,1 млн тонна (жоспардың 104%-ы), пішендеме – 80,6 мың тонна (103,1%), сүрлем – 195 мың тонна (101,8%), сабан – 81,4 мың тонна (100%), құрама жем – 141,1 мың тонна (100,7%) мөлшерінде дайындалған, деп хабарлайды Altaynews.kz тілшісі.

Қазір ШҚО-да егін жинау науқаны толық аяқталған. Дәнді дақылдардың орташа өнімділігі – гектарынан 14,4 центнер. Көктем мен жаздағы құрғақшылық және егін жинау кезіндегі жауын-шашынның көп болуы өнімділіктің сәл төмендеуіне әсер еткен. Майлы дақылдар биыл 210,9 мың гектарға егілген, жалпы түсім былтырғы деңгейде, яғни жалпы түсімі 390,7 мың тонна болды, өнімділік – 18,7 ц/га.