Облыс орталығында жеңіл атлетикадан жасөспірімдер мен кіші жастағы ұл-қыздар арасындағы жабық кешендегі Қазақстан чемпионаты басталды. Ольга Рыпакова атындағы жеңіл атлетика манежінде жалауы желбіреген дода үш күнге созылмақ.

Облыстық денешынықтыру және спорт басқармасынан хабарлағандай, биылғы жарысқа 700-ден астам атлет жиналған. Бұл тұрғыдан алып қарағанда, Өскемендегі жарыс рекорд орнатты деуге болады. Мұны басқарма басшылығы да айтып отыр, деп хабарлайды Altainews.kz тілшісі.

Басқарманың ақпаратына сенсек, бүгінде еліміздегі жабық кешендердегі жарыстардың дені Астанада өтеді. Дегенмен, кей додаларды Шығыс Қазақстан облысының орталығы қабылдайды. Кіші жастағы ұлдар мен қыздар, сондай-ақ жасөспірімдер арасындағы ел біріншілігін солардың қатарына қосуға болады.

Айта кетейік, бұл чемпионаттың қорытындысы бойынша ел құрамасы жасақталып, алдағы халықаралық жарыстарда ел намысын қорғайтын болады. Сондай додалардың ішіндегі ең айтулысы биылғы сәуір айының соңында Біріккен Араб Әмірліктерінің Дубай қаласында өтетін Азия чемпионаты болатыны сөзсіз.