Қазгидрометтің ақпаратына сүйенсек, Риддердің биік таулы өңірлеріндегі қар жамылғысы 3 метр, биіктігі орташа тауларда  – 75 см, топырақтың қатуы - 36 см. Риддер қаласының ішіндегі қар түгелдей еріп кетті, деп хабарлайды  Altainews.kz тілшісі.

Жергілікті әкімдік пен құзырлы қызметтер өңірдегі су тасқыны жағдайын тәулік бойы бақылап отыр.

Риддер қаласының әкімі Дәулет Батырбаевтың айтуынша, арықтар мен су өткізгіш арналар тазартылды. Қауіп төндіріп тұрған орындарда су өткізу үшін қосымша құбырлар қойылған.

Ботаника ауылында еріген судың өтуіне кедергі келтіріп арықтарда өсіп кеткен ағаштарды кесуге тура келген. Ал су тасқыны кезеңі аяқталған соң көшелердің бойында көшеттер отырғызылады.

Бүгінгі таңда қалада 9 мотопомпа бар, қажет болған жағдайда қолданылады.

Сонымен қатар, халықты дереу көшіру қажет болған жағдайда үш оқу орнында эвакуация орындары дайындалған. Оған 180 адамды орналастыруға болады және тағы 150 орынға үш қонақ үймен келісімшарттар жасалды.

Риддер қалалық ТЖБ басшысының орынбасары Сергей Бородиннің айтуынша, құтқарушылар жергілікті атқарушы органдармен бірге өзендердегі су деңгейіне тәулік бойы мониторинг жүргізіп, кез келген жағдайға әзір отыр.