Шығыс өңіріндегі 162 мектеп «Starlink» интернет жүйесіне қосылады, деп хабарлайды Altainews.kz тілшісі.

Облыстық білім басқармасы «Республикалық ғарыштық байланыс орталығы» АҚ-мен «Starlink» геостационарлық емес байланыс жүйесі негізінде кең жолақты интернет желісіне қолжетімділікті қамтамасыз ету жөніндегі пилоттық жобаны іске асыру бойынша шарт жасасты.

Жоспар бойынша «Starlink» жүйесіне облыстағы 170 мектеп қосылуы тиіс еді. Бірақ спутникті желі 162 білім мекемесіне орнатылатын болды.  Өйткені сегіз мектепке интернет талшықты-оптикалық байланыс желілері арқылы жеткізілген.

Үлкен Нарын ауданындағы Сенное ауылының мектебі «Starlink» жүйесіне қазірдің өзінде қосылып қойғанын айта кетуіміз керек.

Өзге мектептерге «Starlink» қондырғысы, күн райы қолайсыздық туғызбаса, мамыр айының ортасына дейін орнатылады.