ШҚО еріктілері Тайынтыда 20 мың көшет екті
Ұлан ауданының Тайынты ауылы маңында 20 мың көшет егілді, деп хабарлайды Altainews.kz тілшісі.
«Таза Қазақстан» акциясы аясында еріктілердің бастамасымен Тайынты ауылын көгалдандыру жұмыстары жалғасын табуда. Мұнда бүгін облыстың аудан-қалаларынан, атап айтсақ Өскемен, Риддер қалаларынан, Ұлан, Губокое, Алтай аудандарынан барлығы 200-ге жуық адам жиналды.
- «Таза Қазақстан» акциясы аясында еріктілердің бастамасымен Ұлан ауданының Тайынты ауылында көшеттер егіліп жатыр. Акцияның мақсаты - қоршаған ортаны көгалдандыру, жасыл желектің қорын молайту. 5-7 мамыр аралығында жиырма мың түп көшет егіледі. Бүгінгі жұмысқа облыстың барлық өңірінен еріктелер, облыс тұрғындары мен экоблогерлер атсалысып жатыр. Шамамен 200 адам жұмылдырылды, - дейді ШҚО еріктілер фронт офисінің жетекшісі Айдос Әділбеков.
Облыс бойынша жыл соңына дейін 29 млн көшет отырғызылмақ.
Айта кетейік, әлем бойынша экожүйені қалпына келтіруге атсалысып жүрген экоблогер Алексей Сибирский ағаш отырғызу бойынша әкімдікке ұсыныс жасаған. Ұйымдастыру жұмысын әкімдік жүргізген. Отырғызылған көшеттердің күтімімен жергілікті орман шаруашылығы айналысады.
– Көшеттерді жаңбырлы күні еккен жөн. Көшет егілгеннен кейін жаңбыр жауса, тіпті тамаша. Біз, әдетте, тал еккен кезде циркон тыңайтқышын пайдаланамыз. Бұл ағаштардың өмір сүру мерзімін ұлғайтады, – деген Алексей Сибирский аймақ тұрғындарын табиғат игілігі үшін еңбек етуге шақырды.
Оқи отырыңыз
