Бір аптадан кейін мектептерде жазғы демалыс басталады. ШҚО ТЖД бастығы Ерғали Бахаевтың айтуынша, нақ осы кезеңде балалар қатысқан жазатайым оқиғалар көбейеді, яғни терезеден құлау, суға бату, отпен ойнап, өрт шығару фактілері жиілейді. Сондықтан ата-аналар қауіпсіздік ережелерін сақтауы керек.

Құтқарушылар ең алдымен ата-аналарға еш жағдайда баланы қараусыз қалдырмауды, дәрі-дәрмекті, қауіпті, өткір заттарды, сіріңке, оттықты балалардың қолы жетпейтін жерде сақтауды ескертеді. Сондай-ақ терезелерге «балалар құлпын» орнатуды ұсынады, деп хабарлайды Altainews.kz тілшісі.

Бала өрт кезінде өзін қалай ұстау керектігін, түтін кезінде мұрын мен ауызды дымқыл шүберекпен жауып, сыртқа шығу керектігін білуі керек.

Үйден шығып бара жатқанда электр құралдарын қосулы қалдырмаңыз, зарядтағыштарды түнде розеткадан суырып қойыңыз.

«101», «112» және «103» телефондары пәтерде көрнекті жерде болуға тиіс, сондай-ақ бала үйінің мекенжайын, ата-анасының телефон нөмірлерін білуге тиіс.

Фото: ШҚО ТЖД баспасөз қызметі