Биыл ШҚО-да Жол жылы аясында жалпы ұзындығы 600 шақырым болатын жолдар мен көшелер жөнделеді. Оның 180 шақырымы облыстық жолдар болса, 420 шақырымы – аудандық жолдар және елді мекен көшелері, деп хабарлайды Altainews.kz тілшісі.

Биыл облыстық және аудандық жолдарды жөндеу жұмысын қаржыландыру 7 млрд теңгеден 15 млрд теңгеге дейін, яғни 2 есеге ұлғайды. Ал елді мекендердің көшелерін жөндеуді ескере отырып, жалпы 31 млрд теңге игерілмек.

Бұл туралы облыстық мәслихаттың кезекті сессиясында Шығыс Қазақстан облысының әкімі Ермек Көшербаев мәлім етті.

Бұдан басқа Бұқтырма су қоймасы арқылы көпір салу, Осинов асуын айналып өту үшін Өскемен – Рахман қайнары жолын реконструкциялау жалғасып жатыр.

Айта кетейік, Өскемен мен Риддерде жолаушылар тасымалының сапасын жақсарту мәселесі де оң шешілуде. Былтыр екі қалаға 42 автобус сатылып алынса, биыл тағы 76 автобус пен 30 шағын автобус сатып алынады.