Төртжылдықтың басты додасы саналатын олимпиада ойындарына да аз уақыт қалды. Батырхан Төлеуғали – Қазақстан құрамындағы олимпиада жолдамасын жеңіп алған ең жас спортшы. Ол небәрі 17 жасында таеквондодан лицензиялық турнирде топ жарып, Париж олимпиадасына қатысу мүмкіндігіне ие болды, деп хабарлайды Altainews.kz тілшісі.

Батырхан Төлеуғали Париж олимпиадасының жолдамасына биылғы наурызда Қытайдың Тайань қаласында өткен лицензиялық турнирде қол жеткізген болатын. Ұлттық құрамадағы ең жас таеквондошы алғашқы жекпе-жегінде Акшай Худаны (Үндістан) айқын басымдықпен ұтып, ширек финалдан сүрінбей өткен. Шешуші айқаста Сауд Арабиясының өкілі Әли Мабрук әл-Мабруктан 2-0 есебімен басым түскен-ді.

Батырхан Абай облысындағы Аягөз ауданында дүниеге келген. Әкесі – әскери адам, анасы – қазақ тілі мен әдебиеті пәнінің мұғалімі. Ата-анасының жұмыс бабы бойынша Өскеменге көшіп келген. Осы жақта 8 жасынан бастап таеквондомен айналыса бастады. Кинодағы спорттық элементтерді қайталап, шпагатқа отырып, аяқпен тебуді өздігінен үйренген. Үйдегілер де қабілетін байқап, спортқа баули бастайды. Осылайша ол үшін таеквондо әлеміне жол ашылып, кәсіби тұрғыда айналысуға бел буды.

Қазақта «Жалғыздың үні шықпас» деген жақсы сөз бар. Осы уақытқа дейін Батырханның жеткен жетістігінің артында тұрған адам көп. Әуелі ата-анасының, алғашқы бапкерінің, Өскемендегі спарринг-серіктестерінің және ұлттық құрама спортшыларының, бас бапкер Нұрсұлтан Мамайдың қосқан үлесі орасан зор. Алдымен жасөспірімдер арасында әлем чемпионатының қола жүлдегері атанып, көзге түсті. Содан соң Қазақстан спартакиадасында топ жарған соң, ересектер арасында Түркістанда өткен оқу-жаттығу жиынына шақырту алды. Ересектер арасында Түркия және Біріккен Араб Әмірліктеріндегі турнирлерге қатысып, «Фуджейра оупен» додасында қола жүлдегер атанса, Түркияда жергілікті спортшыға есе жіберді. Испанияда өткен оқу-жаттығу жиынында 12 қарсыласпен спаррингтік кездесу өткізіп, барлығында жеңіске жетті. Оның үлкен спорттағы даңғылы енді басталып жатыр. Тәжірибесі әлі де аз, бірақ шеберлігін арттыруға бар күшін салып жүр. Енді олимпиада қарсаңында дайындықты одан әрі үдеткен. Париж төрінде жанкүйерді жерге қаратпауға тырыспақ. Жолдамаға қол жеткізген соң тіптен жігерленіп кеткенін айтады.

Батырхан Төлеуғали Максим Храмцов, Салех әл-Шарабати, Сейф Ейсса сынды Токио олимпиадасының жүлдегерлерімен бір салмақта сынға түспек. Ересектер қатарына енді ғана қосылғандықтан, Батырхан олармен әлі кездескен емес.

Батырхан қазір Олимпиада ойындарына дайындалуда, оқу-жаттығу жиындары шетелде өтіп жатыр. Спортшының Парижде үздіктер қатарынан көрінуге әлеуеті де, тәжірибесі де жетеді. Біз жерлесіміздің жеңіс тұғырынан көрінетініме сенімдіміз.