Шығыс Қазақстан облысының әкімі Ермек Көшербаев Ұлан ауданының тұрғындарымен кездесу өткізіп, оның барысында бірқатар мәселелерді өз бақылауына алған болатын.
Кездесуде Қасым Қайсенов кентінің тұрғыны Әсем Салықова өңір басшысына 1-ші шағын аудан, Аманжолов, Қайсенов көшелеріне кәріз және жылу желілерін тарту қажет екенін айтқан еді. Облыс әкімі бұл жайтты назарға алып, Ұлан ауданының әкіміне қысқа мерзімде аталған мәселенің шешу жолын қарастыруды тапсырды, деп хабарлайды Altainews.kz тілішсі.
Бүгін аудан басшылығы тұрғындармен кездесіп, алдағы уақытта қандай жұмыстар атқарылатыны жайлы жеткізді.
- Қасым Қайсенов кентінде жылу желілерін қайта құру бойынша жоба әзірленді. Жоба 3,7 млрд теңгені құрайды. Демек, кентті 100% жылумен қамтамасыз етуге мүмкіндік бермек. Жеке тұрғын үй секторлары да шет қалмайтын болады. Биыл жұмыс басталып кетті. 873 метр магистральды құбырды ауыстырылады. Келесі жылы кварталішілік желілерді ауыстырамыз. Бұл ауқымды жұмыстардың барлығын келер жылдың тамыз айына дейін аяқтауды жоспарлап отырмыз, - деді Ұлан ауданы әкімінің орынбасары Ринат Болатқан.
Сондай-ақ ол Қасым Қайсенов кентінде жер асты суларының көтерілуі басты проблемалардың бірі екенін атап өтті.
- Бұл мәселені шешу үшін облыс әкімі биыл су бұру каналына жобалау-сметалық құжаттаманы әзірлеуді тапсырды. Қазір тиісті жұмыстар басталып кетті. Қаржы бөлінген жағдайда, 2025-ші жылы аталған жұмыс аяқталады деп отырмыз, - деді Ринат Болатқан.
Облыс әкімі бірден іске көшіп, өтініш-тілегімізге құлақ асқанына тұрғындар да дән риза екенін жеткізді.
- Екі күн бұрын ғана ауданымызға өңір басшысы Ермек Көшербаев келіп, көтерген мәселемізді естіп, аудан басшыларына тапсырма беріп кеткен еді. Міне, бүгін аудан әкімінің орынбасары келіп, көп жылдар бойы айтып келе жатқан проблемамыздың шешілетін күні жақын екенін жеткізді. Берілген жауаптарына қанағаттандық,- дейді кент тұрғыны Әсем Салықова.
