Шығысқазақстандық педагог Президент қолымен мәртебеленді
Педагог мәртебесі туралы заңға сәйкес мұғалімдердің қоғамдағы дәрежесін көтеру үшін «Қазақстанның еңбек сіңірген ұстазы» атағы енгізілген болатын. Бұл – жай атақ емес, мәртебелі мемлекеттік награда. Оның иегеріне қомақты сыйақы беріледі. Осы уақытқа дейін республика бойынша 46 мұғалім ғана осы наградаға ие болған, деп хабарлайды Altainews.kz тілшісі.
5 қазан күні Қасым-Жомарт Тоқаев ұстаздар қауымын кәсіби мерекесімен құттықтап, аса жауапты әрі қастерлі міндетті абыроймен атқарып жүрген педагогтерді Ақорда резиденциясында қабылдап, оларды марапаттады.
Мемлекет басшысының алдына барып, мақтау мен марапатқа ие болған ұстаздардың қатарында Өскемен қаласының №46 орта мектебінің химия пәні мұғалімі Назым Актанова да болды.
Ұстаздар Президетпен кездеспес бұрын Ақорданың ішін аралап, қысқы бақта ұйымдастырылған жанды музыканың сүйемелеуіндегі Абай оқуларын тамашалады.
Мемлекет басшысы Қазақстанның білім саласында аянбай еңбек етіп жүрген үздік ұстаздармен кездесу барысында білім саласындағы өзгерістер, атқарылып жатқан жұмыстар және ұстаз мәртебесі жайлы сөз қозғады.
Жиын соңында Мемлекет басшысы білім беру ісіндегі аса үздік жетістіктері және Қазақстан Республикасына сіңірген айрықша еңбегі үшін бір топ педагогке «Қазақстанның еңбек сіңірген ұстазы» атағын тапсырды.
Ақерке Рағызбаева