Биыл орталық мемлекеттік органдардың тиісті айға жоспарланған қаражатты уақтылы жібермеуі Шығыс Қазақстан облысындағы «Ауыл - ел бесігі» жобасын іске асыру барысында қиындық тудырған. Бұл туралы облыстық әкімдікте өтіп жатқан жиын барысында экономика және бюджеттік жоспарлау басқармасы басшысының міндетін атқарушы Динара Жұманова мәлім етті,- деп хабарлайды Altainews.kz тілшісі. 

Шығыс Қазақстан облысында «Ауылым - ел бесігі» жобасы аясында ағымдағы жылдың 24 қазанындағы жағдай бойынша 89 жобаның 31-і аяқталған. Осылайша, бұл жоба бойынша Самар, Тарбағатай, Ұлан аудандарында бірқатар шаруа атқарылған. Қалған 58 жоба бойынша тиісті жұмыстар жалғасуда. Оның ішінде 49 жоба жыл соңына дейін аяқталады деп күтілуде.  Ал сегіз жоба келер жылы тапсырылмақ.
Жиында облыс әкімінің бірінші орынбасары Нұрымбет Сақтағанов ағымдағы жылдың 20 желтоқсанына дейін «Ауыл – ел бесігі» бағдарламасы аясында 89 жобаға бөлінген қаражатты толық игеруді, құрылыс-монтаж жұмыстарының уақтылы және сапалы аяқталуын қадағалауды талап етті. 

Жиында аймақ басшысының бірінші орынбасары «Ауыл – ел бесігі» жобасы аясында өңірде жүзеге асырылып жатқан барлық жоба  бойынша бюджет қаражатының толық игерілуіне мониторинг жүргізуді қаржы басқармасының басшысы Светлана Большаковаға тапсырып, осы бағыттағы жұмыстарды бақылауында ұстайтынын жеткізді.