Сәрсен Аманжолов атындағы Шығыс Қазақстан университетінің базасында өңірдегі жоғары оқу орындарының студенттері арасында «Эрудиттер форумы» атты интеллектуалдық байқау ұйымдастырылды, деп хабарлайды  Altainews.kz тілшісі.

Байқау «Экономикалық құқықбұзушылықтардың алдын алу және профилактика» жобасы аясында Шығыс Қазақстан облысының Экономикалық тергеу департаментінің қолдауымен өтті.

Байқау барысында студенттер өздерінің жоғары білім деңгейін, логикалық ойлау қабілеттерін және командалық жұмыстағы шеберліктерін көрсетті. Жарыс бірнеше кезеңнен тұрды: жалпы білімге арналған викториналар, практикалық тапсырмаларды шешуге бағытталған кейстер және қаржылық сауаттылықты арттыруға арналған тапсырмалар.

Қатысушылардың жұмысын әділқазылар алқасы бағалады. Оның құрамында «Қарызсыз қоғам» жобасының менторы Жұмағұлов Е.Т., ШҚО Экономикалық тергеу департаменті 1-бөлімшесінің басшы орынбасары Күлжанбеков Б.У., «Антарес А» қоғамдық қорының өкілі Байбусунов С.А. және ҚР Президенті жанындағы Жастар саясаты кеңесінің мүшесі Ерболова Б.Е. болды.

Байқау қорытындысы бойынша 1-орынды Қазақстан-Американдық еркін университетінің студенттер командасы жеңіп алды. 2-орынды Сәрсен Аманжолов атындағы ШҚУ студенттері иеленсе, 3-орын Дәулет Серікбаев атындағы ШҚТУ студенттеріне бұйырды.

Жеңімпаздар Шығыс Қазақстан облысының Экономикалық тергеу департаментінің басшысы Молдабеков А.К. атынан дипломдармен марапатталды.