Заманауи үй-жайлардың аздығы, ескірген жабдықтар мен білікті кадрлардың жетіспеушілігі - Шығыс Қазақстан облысы ветеринарлық қызметінің негізгі проблемалары болып отыр. Бұл туралы облыс әкімдігінің отырысында ШҚО ветеринария басқармасының басшысы Рамиль Сағындықов мәлім етті, деп хабарлайды Аltainews.kz тілшісі.

Құзырлы басшының айтуынша, 11 коммуналдық мемлекеттік кәсіпорынның және 99 ветеринарлық пункттің 9-ының жеке үй-жайлары жоқ, 38-інің жеке үй-жайлары бар, 16-сы жалға алынған, ал 36-сы ауылдық әкімдіктердің ғимараттарында орналасқан. Тапшылықты жою үшін тағы 45 модульдік ветеринарлық пункт салу қажет.

Қазіргі заманғы ақпараттық жүйелерді енгізуге және планшеттер жаңартылғанына қарамастан, ұйымдастыру техникасының едәуір бөлігі (201 компьютердің 118-і) ескіруге байланысты ауыстыруды талап етеді (олар 2014 жылы сатып алынған). Интернет байланысының проблемалары да ортақ жұмысқа кедергі келтіруде.

Рамиль Сағындықовтың пікірінше, аталған мәселелерді шешу үшін кешенді шаралар қажет - материалдық-техникалық базаны жақсарту, жалақыны арттыру, ветеринарлық қызметтердің жүктемесі мен баға прейскурантының бірыңғай нормаларын әзірлеу, басқа салалардан мамандарды тарту және кәсіптік бағдарлау жұмысын жүргізу.

Басқарма басшысы атап өткендей, Шығыс Қазақстан облысындағы эпизоотиялық жағдай жақсы және ветеринарлық қызметтің тұрақты бақылауында.

Кеңес қорытындысы бойынша облыс әкімінің бірінші орынбасары Нұрымбет Сақтағанов ветеринария басқармасына, қалалар мен аудандар әкімдеріне экономика және бюджеттік жоспарлау басқармасымен бірлесіп, жыл соңына дейін 2025-2027 жылдарға арналған ветеринариялық-санитариялық нысандарды дамытудың кешенді жоспарын әзірлеуді тапсырды. Бұдан басқа, қала және аудан әкімдері ветеринария басқармасымен бірлесіп, мал қорымдарын салуға арналған жобалық-сметалық құжаттаманы уақытылы әзірлеуді қамтамасыз етуі қажет.