Шығыс Қазақстан облысының 43 жастағы тұрғыны кәмелетке толмаған баласын асырауға арналған алиментті төлемегені үшін 9 ай мерзімге бас бостандығынан айырылды. Оның алимент бойынша қарызы 2 миллион теңгеден асқан,- деп хабарлайды Altainews.kz тілшісі.

Ер адам өз міндеттерін орындаудан бірнеше рет жалтарып, сот шешімдері мен ескертулерге қарамастан ешқандай әрекет етпеген. Нәтижесінде сот органдары оған қатаң шара – бас бостандығынан айыру жазасын қолдану туралы шешім қабылдады. Бұл шешім алимент төлеу міндеттерін жүйелі түрде орындаудан жалтарып жүрген азаматтарға сабақ болуы мүмкін.

Заңнамаға сәйкес, алимент төлемеу тек айыппұлдармен шектелмейді. Қазақстан Республикасының Қылмыстық кодексінің 139-бабына сәйкес, алиментті төлеуден жалтару ауыр қылмыс болып саналады және бұл әрекетке қатысты қылмыстық жауапкершілік, тіпті бас бостандығынан айыру жазасы да көзделген. Мұндай шаралар, ең алдымен, балалардың құқықтарын қорғауға бағытталған. Балалар ата-аналарының жауапсыздығынан зардап шекпеуі керек.

Шығыс Қазақстан облысы бойынша анықтау бөлімшелері жыл басынан бері алимент төлемеу фактілері бойынша сотқа 36 қылмыстық іс жолдағанын айта кеткен жөн. Өткен жылмен салыстырғанда мұндай істер санының өсуі алимент төлемеу мәселесінің әлі де өзекті екенін көрсетеді.

ШҚО ПД