Бүгін ШҚО филармониясының залында «Grant Fest» фестивалі өтті, деп хабарлайды  Altainews.kz  тілшісі.

Биылғы оқу жылының аяқталуына да санаулы айлар ғана қалды. Мектеп бітіруші түлектерді «Қандай мамандықты таңдасам?», «Қай жоғары оқу орнына түскен дұрыс?», «Қазіргі еңбек нарығында қандай мамандықтар сұранысқа ие?» деген сияқты сан сауалдар толғандырады. Сондықтан бұл кезеңде оларға дұрыс бағыт-бағдар беретін маңызды алаңдар қажет екендігі даусыз.

Биылғы мектеп бітіруші түлектер үшін осындай жаңа мүмкіндіктер алаңын «Grant» білім беру орталығы ұйымдастырды.

Мектеп бітіруші түлектерге жоғары оқу орнын және болашақ мамандықтарын таңдауда бағыт-бағдар беретін ауқымды іс-шараға Өскеменнің білім ошақтарының 10-11 сынып оқушылары, олардың ата-аналары мен мектеп мұғалімдері қатысты.

Фестиваль барысында еліміздің жетекші жоғары оқу орындары, соның ішінде басқа қалалардан келген университеттер де өздерінің білім беру бағдарламаларымен таныстырды. Олардың қатарында Л.Н.Гумилев атындағы Еуразия ұлттық университеті, Turan-Astana университеті, ІІМ Б.Бейсенов атындағы Қарағанды академиясы, Семей медицина университеті және басқа да жоғары оқу орындары бар.

Шараға қатысушылар оқу орындары мен мамандықтар туралы толық ақпарат алып қана қоймай, университет өкілдеріне сауалдарын қойып, жеке ақыл-кеңес алды.

«Grant» білім беру орталығының басшысы Құндыз Мұратқызының айтуынша, «Grant Fest» фестивалінің мақсаты мен басты ерекшелігі – оқушыларға жоғары білімге қол жеткізуді жеңілдету, саналы таңдау жасауға көмектесу және білім беру саласындағы соңғы мүмкіндіктермен таныстыру.

Шара барысында жоғары оқу орындарының көрмесі өтіп, мазмұнды конференциямен жалғасты. 

                                                                       Айжанат Бақытқызы

Фото: Аяужан Утеулинова

Видео: Ермек Жиенбеков