Ұлан ауданында жылу жүйесінің дамуы мен тұрғындарды сапалы жылумен қамтамасыз етуге бағытталған жұмыс кезең-кезеңімен жүзеге асырылып келеді. Бұл бағытта бірқатар ауқымды жобалар мен жұмыстар қолға алынған, олар ауданның инфрақұрылымын жақсартып, тұрғындардың өмір сүру сапасын арттыруға септігін тигізуде, деп хабарлайды  Altainews.kz тілшісі.

2023 жылы Таврия ауылында жылу жүйесінің құрылысы басталып, осы мақсатта 367,5 миллион теңге қаражат бөлінді. Ал 2024 жылы жаңа қазандықтың құрылысы басталды, оның жалпы құны 965,7 миллион теңге. Қазіргі уақытта бұл жобаның 811,6 миллион теңгесі республикалық бюджеттен бөлініп, «Терезе» ЖШС мердігер ұйымы құрылыс жұмыстарын жүргізуде. Қазандықтың іске қосылуы ауданның жылу жүйесінің тұрақтылығын қамтамасыз ететін маңызды қадам болып табылады.

Жылу жүйесінің тұрақтылығын қамтамасыз ету мақсатында Қасым Қайсенов кентінде жылу желілерінің ағымдағы жөндеу жұмыстары да жүргізілді. 48,1 миллион теңге көлемінде жылу желілеріне және 187 миллион теңге көлемінде орталық қазандыққа жөндеу жұмыстары жүргізілді. Бұл жұмыстар да облыстық бюджеттен қаржыландырылды.

Ұлан ауданында жылу жүйесімен қамтамасыз ету мәселесі алдын ала дайындықтармен де қамтамасыз етілуде. 2024-2025 жылдардағы жылу беру маусымына дайындық жұмыстары аясында «Айтас-Энерго» ЖШС мен «Қаражыра» АҚ арасында қатты отын, яғни 57 мың тонна көмір сатып алу туралы келісім жасалды. Қазіргі уақытта орталық қазандықта 3 977 тонна көмір бар, бұл 21 күнге жететін жеткілікті қорды білдіреді.

Аудандағы тұрғындар өздеріне қажетті көмірді Өскемен қаласындағы Сол жағалау теміржол станциясынан 15 800 теңге бағасымен сатып алуда. Сонымен қатар, ауданның бюджет ұйымдары мен жылу көздері 100%-ға қамтамасыз етілген, бұл жылу маусымының сәтті өтуіне кепіл болады.

Қоршаған ортаны қорғау мәселесіне де көңіл бөлінуде. Мысалы, Огневка ауылы маңындағы Тайынты өзенінде өткен жылы ауқымды экологиялық шаралар өткізілді. «Коммунальник» КМК және Асубұлақ орман шаруашылығының қызметкерлері өзен арнасын бөгеу үшін құндыздар құлатқан ағаштарды тазалап, бұл жұмыс көктемгі су тасқынының алдын алу мақсатында жүргізілді. Тазаланған ағаштар тұрғындарға отын ретінде беріліп, әлеуметтік көмек ретінде пайдаланылуда.

Қорытындылай келе, Ұлан ауданында жылу жүйесін дамыту мен экологиялық мәселелерді шешуге бағытталған жұмыстар тұрақты түрде жүргізілуде. Әлеуметтік инфрақұрылымды жаңғырту және тұрғындардың қажеттіліктерін ескере отырып жасалған бұл жобалар аудан халқының әл-ауқатын арттыруға және инфрақұрылымның сапасын жақсартуға мүмкіндік береді.

Ержан Әбіш