Облыста он мыңға жуық жұмыс орны ашылды. Оған «Даму» қоры қолдау көрсетті, деп хабарлайды Altainews.kz тілшісі.

Ағымдағы жыл басынан бері бұл қор мемлекеттік бағдарламалар бойынша 639 шағын және орта кәсіпкерлік жобасына қаржылай көмек берді. Осы мақсатта 26,7 миллиард теңге жұмсалған.  Оның ішінде 395 жобаға субсидия бөлінген. Ал жалпы құны 8,4 миллиард теңгені құрайтын 244 жоба кепілдік қою арқылы қаржыландырылған. Сонымен қатар 39 жобаға 1,4 миллиард теңге көлемінде жеңілдетілген несие бөлінген.

Естеріңізге сала кетейік, «Даму» қоры шағын және орта бизнеске субсидия бөліп, кепілдік беріп, жеңілдікпен қаржыландырады. Субсидия – кәсіпкерлердің несиесінің пайызын азайтады. Нәтижесінде жеке кәсіп иесі үнемделген қаражатты ісін дамытуға жұмсай алады. Бизнес ашуға немесе кәсіпті дамытуға несие аларда банк талап еткен кепілмүлік аз болған жағдайда аталмыш қордың кепілдігі көмектеседі.

Ажар Сағатбекова