Өскеменде қардың толассыз жаууына байланысты  қала тұрғындарының қауіпсіздігі мен қолайлы өмір сүру жағдайын қамтамасыз ету мақсатында қазір 88 техника жұмылдырылған, деп хабарлайды  Altainews.kz тілшісі.

Бүгін қала бойынша жүргізілген рейд барысында шаһар басшысы Алмат Ақышов айтып өткендей, көше жолдарында мұз қатудың алдын алу, жол қозғалысы мен қоғамдық көліктің қауіпсіздігін қамтамасыз ету үшін техникалық тұз қосындысы себілген. Алайда, қазір оның орнына тұз қоспасының баламасы ретінде өзге материал себу жағы қарастырылуда.

Жолдарды қардан тазарту жұмыстарын жүйелі ұйымдастыру қала әкімінің жіті бақылауында. Қазірдің өзінде 88 арнайы техника мен тракторлар жұмыс істеп жатыр. Оның жартысы қаланың ішін тазартса, қалған техникалар Согра, Красин, Самар тас жолы, Күленов кенті, Жыланды сияқты қала шетіндегі ықшамаудандарды қардан тазартып жатыр.

Қала әкімінің айтуынша, бүгінде барлығы 97 техника бар. Сала мамандары, техника жүргізушілері күн-түн демей, кезегімен тиісті жұмыстарын атқаруда.  

Қар тазарту жұмыстарына қалалық коммуналдық қызметтермен қатар арнайы мердігер ұйымдар да тартылған. Олар көше бойларын тазалау, қар жинау, оны қала сыртына шығару жұмыстарын үздіксіз атқаруда.

Алдымен басты көшелер мен қоғамдық көлік қатынайтын жолдардың қары тазартылып, кейін кішігірім жолдар мен аулалар тазартылуда.

Айта кетерлік жәйт, қар тазарту жұмыстары тек коммуналдық қызметтер мен арнайы техникалардың қатысуымен шектелмейді.

Бұл орайда пәтер иелері кооперативі немесе меншік иелерінің бірлестігі, қала тұрғындары да өз үйлерінің алдындағы аумақтарды қардан тазалауға міндетті екендігін айта кеткен жөн.

Айжанат Бақытқызы
Фото: Аяужан Утеулинова

Видео: Ермек Жиенбеков