Өскемендегі «Алтай» көтерме-тарату орталығында Ұлан ауданы ауыл шаруашылығы өнімдерінің сенбілік жәрмеңкесі өтті, деп хабарлайды Altainews.kz тілшісі.

Жаңа жыл қарсаңында өткен сенбілік жәрмеңкеге Ұлан ауданының шаруашылықтары алты тоннадан астам ет өнімдерін, төрт тонна көкөніс өнімдерін, бал мен сүт өнімдерін саудаға шығарды.

Алмасай ауылындағы «Қабдыразақ» ШҚ басшысы Нұртілек Сағатов сенбілік жәрмеңкелер тек қала және аудан тұрғындарына ғана емес, өздері сияқты шаруашылықтардың ауыл шаруашылығы өнімдерін саудалауға да игі ықпалын тигізіп келе жатқанын айтты.

Екі отар қой өсіріп, өрісін малға толтырып жатқан Нұртілек алдағы уақытта тұрғындарға қолжетімді, сапалы ет өнімдерін сататын арнайы дүкен ашуды жоспарлап отыр. Астанадағы С.Сейфуллин атындағы ауыл шаруашылығы институтында мал шаруашылығын жүргізу және мал басын асылдандыру мамандығын оқып жатқан ұлы Нұрәлі енді бірер жылдан соң ауылға, шаруашылыққа маман болып келіп, әкесімен бірге ата кәсіпті өркендетуге кіріспек.

Жәрмеңкеге жиналған қалалықтар сауда сөрелерінен жаңа жылдық дастарханға деп қаз, үйрек, қазы, жал-жая, көкөніс өнімдерін де көптеп сатып алды.

Жанаргүл Мұқатай

Фото: Аяужан Утеулинова