Үлкен Нарын ауданындағы Майемер ауылында «Ауылда денсаулық сақтауды жаңғырту» ұлттық жобасы аясында медициналық пункттің құрылысының салтанатты ашылуы өтті. Бұрын медициналық пункт ауылдық клубтың ғимаратында орналасқан еді. Енді бес жүзден астам тұрғыны бар ауыл жаңа, заманға сай медпунктке ие болды, - деп хабарлайды Altainews.kz тілшісі.

Амбулаториялық жағдайда медициналық қызмет көрсету үшін медициналық пункт құрамында: орта медициналық персоналдың үй-жайы (қабылдау бөлмесі), емшара бөлмесі, физиокабинет, дәріхана пункті, анықтамалық пункт көзделген. Нысан ең төменгі үлгілік жиынтыққа сәйкес қажетті медициналық жабдықтармен және медициналық мақсаттағы бұйымдармен жарақтандырылатын болады.
Халықтың мобильділігі төмен топтарының ғимаратына кіру үшін пандус орнату көзделген.

Медициналық пункт бір медбикемен қызмет етеді. Енді ауыл тұрғындары анализ тапсыру, ине салдыру сияқты қарапайым медициналық қызметтерді жақын маңда ала алады.

Осы жобаның нәтижесінде елді мекендердің тұрғындарына «Алтын сағат» қағидатын сақтай отырып шұғыл медициналық көмек көрсетілетін болады.