Полиция қызметкерлері үшін күтпеген құттықтау - ШҚО
Шығыс Қазақстан облысының әкімі Ермек Көшербаев Жаңа жыл қарсаңында сол жағалаудағы полиция бөлімшесіне арнайы барып, кезекші қызметкерлерге жылы лебізін жеткізді, деп хабарлайды Altainews.kz тілшісі.
Әкім құқық қорғау органдарының өкілдеріне адал еңбектері үшін ризашылығын білдіріп, мереке күндері олардың арқасында тұрғындардың қауіпсіздігі мен тыныштығы сақталатынын ерекше атап өтті.
—Қазір барлығы Жаңа жылды атап өтіп жатқанда, сіздер халықтың тыныштығын қорғау жолында қызмет етудесіздер. Бұл кәсіби адалдық пен үлкен жауапкершілікті талап етеді. Сіздердің еңбектеріңіз жоғары құрметке лайық. Алдағы жыл сіздерге мықты денсаулық, отбасы амандығы және кәсіби табыс әкелсін. Атқарып жатқан қызметтеріңіз үшін шын жүректен алғысымды білдіремін, – деді Ермек Көшербаев.
Айта кетейік, өңір басшысының құттықтауы полиция қызметкерлерінің еңбегіне деген құрмет пен алғыс сезімін айқын көрсетті. Жаңажылдық қызмет кезінде полицейлер қоғамдық тәртіпті қамтамасыз етіп, облыс тұрғындарының қауіпсіздігі үшін тәулік бойы жұмыс істеуін жалғастыруда.
Оқи отырыңыз
