Шығыс Қазақстан облыстық арнаулы кітапханасында қазақ әдебиетінің көрнекті өкілі Ілияс Есенберлиннің 110 жылдығына орай «Ілияс Есенберлин – Ұлы даланың даңқты ұлы» атты портрет кеші ұйымдастырылды.

Ілияс Есенберлин – қазақтың ұлттық тарихын көркем әдебиет арқылы ұрпаққа жеткізген бірегей тұлға. Ол «Алтын Орда» және «Көшпенділер» тарихи романдарымен халқымыздың жеті ғасырлық тарихын толық қамтып, дала өркениеті мен қазақ мемлекеттілігінің маңыздылығын көрсетті. Жазушының шығармалары 30-дан астам тілге аударылып, жалпы таралымы тоғыз миллионға жеткен. Оның еңбектері халықтың тарихи санасын оятып, ұлттық құндылықтарды сақтауға ерекше үлес қосты.

Портрет кеші барысында жазушының өмірі мен шығармашылығы туралы қызықты әңгімелер айтылып, «Намыс» поэмасынан үзінді оқылды. Қатысушылар жазушының өмір жолы мен шығармашылығын қамтыған бейнематериалды тамашалады.

Шараның ерекше бөлімі – Л. Брайльдің бедерлі-нүктелі қарпімен дайындалған «Көшпенділер» кітабына жасалған әдеби шолу болды. Бұл қадам кітапхана оқырмандары үшін Есенберлин шығармашылығына жақын болуға мүмкіндік берді.

Сонымен қатар, әдеби кеште Ж. Ислямованың орындауындағы «Жолыққан қандай жақсы» және Д. Ишуниннің «Алға, Қазақ жігіттері» музыкалық композициялары кештің шырайын ашып, ерекше әсер қалдырды.

Фото: Шығыс Қазақстан облыстық арнаулы кітапханасы