Былтыр күзде жұмысын бастаған «УКа Трубтех» ЖШС-не қарасты кәсіпорынның өрісі кеңейіп келеді. Бүгін полиэтилен құбырларын шығаруға машықтанған өндіріс орнында тағы бір цех іске қосылды, деп хабарлайды Altainews.kz тілшісі.
Еске салайық, алғашында бұл кәсіпорыннан су мен жылу құбырлары ғана шығарылады деп жоспарланған. Алайда, уақыт өте келе өзге мақсаттарға қажет өнімді де өндіруге болатынына көзі жеткен кәсіпорын басшылығы тың бағытты бетке алыпты.  
Кәсіпорын басшылығының хабарлауынша, қосымша цехта энергетика саласының кабельдік жүйелерін қорғауға бағытталған үш қабатты құбырлар өндірілетін болады.

Кәсіпорын басшылығы хабарлағандай, зауыт Шығыс Қазақстанның ғана емес, көршілес өңірлердің де сұранысын қанағаттандыруға қауқарлы. Өнімі де жоғары сапалы, өндірісте заманауи технологиялар ғана қолданылады. Айта кетейік, қазір облысымызда осы бір бағытта жұмыс жүргізетін басқа кәсіпорын жоқтың қасы. Тіпті, республикамыз бойынша полиэтилен құбырларын шығаратын зауыт саусақпен санарлықтай ғана екен.
Жаңа кәсіпорыннан жылына шамамен 3 600 тонна өнім шығарылады екен. Болашақта бұл көрсеткішті бес мыңға дейін жеткізу жоспарланып отыр.

Осы ретте қазіргі уақытта өндіріс орнында 25 адам жұмыспен қамтылғанын айту керек.

Нұржан Кенжеұлы

фото: Махаббат Ахметжанова