Бір баланың арманы мың баланың тілегін тыңдауға арқау болды
Бүгін Өскеменде өзгеше кездесу өтті. Өңір басшысы Ермек Көшербаев қалалық №24 орта мектепке арнайы келіп, әкімді көргісі келген дарынды қыз Айзеремен және мектеп ұжымымен жүздесті. Ресми тұлғалармен бейресми форматта, емен-жарқын әңгіме-дүкен құрып, көкейдегі сұрақтарын жарыса қойған балалар бір марқайып қалды, - деп хабарлайды Altainews.kz тілшісі.
Орта мектептегі бұл кездесуге ерекше оқиға түрткі болды. 3 сынып оқушысы Айзере Шыңғысқызы ұзақ уақыт бойы облыс әкімін көріп, онымен естелік суретке түсуді қалаған еді. Әкім бұл тілекті орындап, жас дарынның жетістіктеріне жоғары баға берді. Айзере оқу озаты ғана емес, киокушинкай каратэ мен спорттық-балды билер бойынша жарыстардың жеңімпазы, зияткерлік олимпиадалардың жүлдегері. Ол мектеп өміріне белсене араласып, өз үлгісімен қатарластарын шабыттандырып келеді.
Қалауы орындалған Айзере, өз кезегінде, Астана қаласында Ақ ордада болу бақыты бұйырғанда біздің қала мен облысымызды басқаратын адаммен танысқысы келгенін еске алды. Тілегінің орындалғанын қалаған оқушы ақ қағазға жазған хатын анасының көмегімен жолдаған. Айзеренің анасы о баста аймақ басшысының тығыз жұмыс кестесінен уақыт табатынына аса сене қоймағандықтан алдын ала қызының беті қайтпауы үшін дайындай бастапты.
Балалар тарапынан қойылған «Облыстағы ең басты адам болу оңай ма?» деген сұраққа Ермек Көшербаев түсіне білген адамға әр мамандық иесі өз орнында болса сол жердегі «ең басты адам» болуы ықтималдығын атап өтті.
Бұл кездесу, расымен бұрынғыдан өзгеше болды. Қазақи құрақ көрпелерге малдас құра жайғасқан бүлдіршіндер еркіндігімен, ашық сұрақтарымен, бойларындағы ерекше оптимизммен ел ағаларын баурап алды. Әрине, оқушылар тарапынан дайындалған сұрақтар да, тосыннан қойылғандары да болды. Әсіресе, мектептің залдарын жаңарту мен спорт алаңдарын салып беру туралы өтініштер бойынша аймақ басшысы бала сұрағына бала тілімен жауап беруге тырысты.
Айта кету керек, бұл мектеп бала саны жағынан қаладағы ең ірі білім ошақтарының бірі болып саналады. О бастағы қуаттылығы 800-ге жуық оқушыға арналған мектеп қабырғасында қазіргі уақытта мың жарымдай оқушы екі ауысымда білім алуда. 0-ден 11-ге дейін 60 сынып оқып жатқан білім ошағында 111 педагог қызмет етеді. Жалпы жұмыс орын 144 адамды құрап отыр. Мектептің ерекше мақтанышы тек жетістігі мол дарынды балалар ғана емес, соңғы үш жылда білімді әскери тәрбиемен ұштастырып келе жатқан кадет сыныптары.
Қазір «орта мектеп» дәрежесінде жұмыс істеп тұрған №24 мектеп ұжымы оқушылардың жан-жақты дағдыларын дамыту мақсатында «мектеп-қосымша білім беру орталығы» мәртебесін алуға ниет білдіруде. Сонда ғана қосымша қызметкерлер алып, сан түрлі үйірмелерді ұйымдастыруға мүмкіндік пайда болады деп отыр мамандар. Бұл сұрақ алдағы уақытта құзырлы басқарма арқылы қарастырылмақ.
Фото: Махаббат Ахметжанова