Дәстүрді құрметтеумен және белсенді өмір ұстанымымен танымал бұл отбасы азаматтық жауапкершілігіне қаншалықты құрметпен қарайтынын көрсетті. Бүгін Бозанбай ауылындағы Нажитбан отбасы ел үшін маңызды оқиға - референдумға қатысты, деп хабарлайды Altainews.kz тілшісі. 

Нажитбан отбасы 9 адамнан тұрады. Отағасы Нажитбан Маркс жылдар бойы құсбегілікпен айналысып келеді. Бұл көне кәсіпті ұрпақтан-ұрпаққа жеткізіп, бүгінде өзі ғана емес, балалары да осы өнерді жалғастыруда. Нажитбанның жұбайы Олшан Шакерман – жеке кәсіпкер, ол «Асылай» атты туризм саласында қызмет атқарып, өз кәсібін дамытып отыр.

Отбасының үлкен қызы Маркс Ақжан «Айтас» құс фабрикасында жұмыс істейді, ал ұлы Маркс Бақмерей жекпе-жек күресінде бірнеше жүлдеге ие болған спортшы. Кенже қызы Асылы Бозанбай орта мектебінің 3-сынып оқушысы. Отбасының ортаңғы балалары – Бақжан мен Айзере, бала кездерінен бастап құсбегілікке қызығушылық танытып, әкесінің жолын қуып келеді. Әсіресе Айзере бірнеше республикалық бүркітшілер байқауының жүлдегері атанып, өзінің осы саладағы шеберлігін дәлелдеді.

Жанаргүл Мұқатай