Облысымыздың ең көркем жерлерінің бірі — «Нұртау» тау шаңғысы курортында Глубокое ауданы әкімінің жүлдесі үшін таулы шаңғы (слалом) және шаңғымен жүгіру жарыстары бойынша ашық біріншілік өтті. Сайыстарда Батыс Қазақстан, Солтүстік Қазақстан облыстарынан, Астана, Түркістан, Өскемен, Риддер қалаларынан және Глубокое ауданынан келген әуесқой және кәсіби спортшылар бақ сынасты, деп хабарлайды Altainews.kz тілшісі.

Аязды күнге қарамастан, спорт мерекесіне қатысушылар да, оны тамашалаушылар да көп жиналды. Жарысқа қатысушыларды Глубокое ауданы әкімінің орынбасары Евгения Литвиненко құттықтап, сәттілік тіледі.

Глубокое ауданының дене шынықтыру және спорт бөлімі басшысының міндетін атқарушы Расул Мехлисовтың айтуынша, жарыс күрделі әрі трасса да оңай болмаған. Соған қарамастан, шаңғы жарысына екі облыстан және бірнеше қаладан жүзге жуық қатысушы өтініш берген. Жарыстарға 18 жастан асқан спортшылар қатысты. Ең жасы үлкен қатысушы – 66 жаста. Әйелдер 5 шақырым, ерлер 10 шақырым қашықтықта таулы шаңғы және шаңғымен жүгіру жарыстарында бақ сынады.

Өскемендік Айдын Мұхитов табиғат аясында серуендеп, салауатты өмір салтын ұстану мен денсаулықты нығайтудың маңыздылығын атап өтті.

Глубокое ауданы Бобровка ауылдық округінің әкімі Арна Дандыбаев жарыстың басты мақсатын атап өтті:

Глубокое ауданы әкімінің жүлде қоры 1 200 000 теңгені құрады. Жеңімпаздар мен жүлдегерлер (ерлер мен әйелдер жеке есеп бойынша) ақшалай сертификаттар мен медальдарға ие болды.

Жарыстар Глубокое ауданы әкімдігі, «NT Travel» ЖШС және ШҚО дене шынықтыру және спорт басқармасының қолдауымен ұйымдастырылды. Спорт мерекесіне келген қонақтар үшін жылы шатырларда дастархан жайылып, ыстық шай ұсынылды. Қысқы спорт әуесқойларының ешқайсысы суыққа тоңбағанына сенімдіміз. Олар «Нұртау» курортының ерекше атмосферасынан ләззат алып, жергілікті өнерпаздардың өнерін тамашалап, жаңа күш-қуатпен тарқасты.

Айна Ескенқызы

Фото: Нелли Петенева