Өскемендегі №46 орта мектепте алғашқы әскери және технологиялық даярлық пәні мұғалімдерінің кәсіби құзыреттілігін дамытуға арналған республикалық ғылыми-әдістемелік конференция өтті. Іс-шараға Қорғаныс министрлігі, Ұлттық қауіпсіздік комитетінің Шекара қызметі, Төтенше жағдайлар департаменті, Ұлттық ұлан қолбасшылығы, аудандық және қалалық білім бөлімдерінің өкілдері, мектеп директорлары мен әдіскерлер қатысты.

Конференция аясында Қарулы Күштердің қару-жарағы, әскери техникасы мен жабдықтарының көрмесі ұйымдастырылды. Әсіресе оқушылар үшін дрондар мен робототехника ерекше қызығушылық тудырды.

Конференция барысында арнайы шақырылған сарапшылар әскери-патриоттық тәрбие берудің өзекті мәселелерін талқылап, үздік әдістемелермен бөлісті. Сондай-ақ, мектептің әскери дайындық пәні мұғалімі 10-сынып оқушыларымен бірге саптық дайындық бойынша шеберлік сабағын өткізді.

Іс-шара Ұлттық ұланның «Шығыс» өңірлік қолбасшылығының 5518 әскери бөлімінің оркестрі, мектеп оқушылары мен ұстаздары ұсынған мерекелік концертпен аяқталды.

Айна Ескенқызы

Фото/видео: Данияр Сагидолдин