2025 жылдың 5 сәуірінен бастап Қазақстанда мопедтер ресми түрде механикалық көлік құралдарына теңестіріліп, оларды міндетті түрде тіркеу, жүргізуші куәлігін алу, техникалық тексерістен өткізу және сақтандыру полисін рәсімдеу талап етіледі. Алайда, Шығыс Қазақстан облысында мопедтерді тіркеу деңгейі әлі де төмен. Облыстық полиция департаментінің мәліметінше, қазіргі уақытта аймақта бар болғаны 189 мопед тіркелген. деп хабарлайды Altainews.kz тілшісі.

Жаңа талаптарға сәйкес, мопед иелері келесі құжаттарды рәсімдеуі қажет:
-Мемлекеттік тіркеу: Мопедті тұрғылықты жері бойынша мамандандырылған халыққа қызмет көрсету орталығында (ХҚКО) тіркеу. Ол үшін жеке куәлік және мопедтің техникалық құжаты немесе техникалық сипаттамалары туралы ақпарат қажет.  
-Жүргізуші куәлігі: A1, A немесе B санатындағы жүргізуші куәлігін алу. Бұл үшін теориялық және практикалық емтихандарды сәтті тапсыру қажет.  
-Техникалық тексеріс: Мопедті техникалық тексерістен өткізу.
-Сақтандыру полисі: Азаматтық-құқықтық жауапкершілікті сақтандыру полисін рәсімдеу.