Наурыз – қазақ халқының төл мерекесі, табиғаттың жанданып, жаңа жылдың басталуын білдіретін ерекше мейрам. Бұл күні ұлттық құндылықтар дәріптеліп, ата-бабамыздан мирас болған салт-дәстүрлер жаңғырады. Осындай игі бастамалардың бірі ретінде қаладағы оқу орындары, кәсіпорындар мен түрлі мекемелер арасында «Үздік киіз үй» сайысы ұйымдастырылды, деп хабарлайды Altainews.kz тілшісі.

Бұл сайыс тек әдемі безендірілген киіз үйлердің жарысы ғана емес, қазақ халқының мәдениетін, өмір сүру салтын, ұлттық мұрасын насихаттауға арналған маңызы зор шара болды. Әр киіз үй белгілі бір дәстүрді көрсету арқылы көрермендерге ұлттық салт-сананы таныстырып, рухани құндылықтарды насихаттады.

Фото: Махаббат Ахметжанова

Құрылған киіз үйлердің басым бөлігі беташар, келін түсіру, сырға салу, құда күту сынды дәстүрлерді дәріптеді. Олардың ішінде қазақ қыздарының бас киім кию әдебі ерекше көзге түсті.

Әр киіз үй өзіндік ерекшелігімен көзге түсті. Киіз үйлердің іші ұлттық нақышта безендіріліп, қазақтың ою-өрнектерімен көмкерілген көрпелер, текеметтер, кілемдер ілінді. Киіз үйлердің төріне дәстүрлі ыдыс-аяқтар, құрақ көрпелер, сандықтар мен домбыра қойылып, қазақы дастархан жайылды.

Әділқазылар алқасы киіз үйлердің безендірілуін, дәстүрдің қалай көрсетілгенін және ұлттық тағамдардың дайындалуын бағалап, үздіктерді анықтады. Қазылар алқасының шешімімен «Үздік киіз үй» номинациясына қыз ұзату дәстүрін дәріптеген С. Аманжолов атындағы ШҚУ лайық деп танылды. Екінші орынға келін түсіру салтын көрсеткен облыстық прокуратура ие болса, үшінші орынды Абай Құнанбаевтың 180 жылдығына орай сахналық көрініс қойып, Абайдың өлеңдерін оқып, әндерін әуелеткен Д. Серікбаев атындағы ШҚТУ иеленді.

«Үздік киіз үй» сайысы халқымыздың бай мұрасын жаңғыртып, қала тұрғындарына ұмытылмас әсер сыйлады.