Қазақстан-Американдық Еркін Университетінің (ҚАЕУ) заң мамандығының студенттері тұрмыстық зорлық-зомбылық тақырыбында сот процесінің үлгісін өткізіп, ҚР заңнамасы аясында өз шешімдерін шығарды, деп хабарлайды Altainews.kz тілшісі.

Жыл басынан бері облыстық жастар ресурстық орталығы өңір жастарына есірткімен күрес, лудомания, тұрмыстық зорлық-зомбылық сынды әлеуметтік маңызды тақырыптар бойынша түрлі кездесулер, жиындар, тренингтер мен семинарлар ұйымдастырып келеді. Осындай ауқымды іс-шаралардың бірі – ҚАЕУ студенттерінің тұрмыстық зорлық-зомбылық мәселесін заңнамалық тұрғыда талқылауы болды.

Іс-шара барысында заң мамандығының студенттері теориялық білімдерін тәжірибеде қолдану үшін арнайы сот залында шынайы сот процесінің үлгісін қойды. Олар ҚР заңнамасы аясында құқықтарын қорғап, теориялық тұжырымдарын дәлелдеуге тырысты.

Студенттер мұндай тәжірибелік сабақтардың пайдалы екенін атап өтті. Олар сот процесі барысында қорғаушы, прокурор, судья рөлдерін өзара бөлісіп, шынайы жағдайларды талдады.

Оқу-сот процесі студенттердің құқықтық білімдерін жетілдіруге және заң саласындағы кәсіби дағдыларын дамытуға ықпал етті.

Видео: Жәнібек Ырысбай