5 сәуірден бастап ел заңнамасына мопедтерді тіркеу және «А1» кіші санатындағы жүргізуші куәлігін алу талаптарына қатысты маңызды өзгерістер енгізіледі. Жаңа түзетулерге сәйкес мопедтер механикалық көлік құралдары ретінде танылып, оларды міндетті түрде тіркеу және пайдалану үшін белгілі бір талаптарды сақтау қажет болады, деп хабарлайды  Altainews.kz тілшісі.

Мопедтерді тіркеу Өскемен қаласындағы арнайы ХҚКО-да жүргізіледі. Тіркеу үшін жеке басты куәландыратын құжат, мопедтің техникалық паспорты немесе сипаттамалары туралы мәліметтер қажет. Сондай-ақ иелері өтініш толтырып, криминалист-сарапшының тексеруінен өтіп, мемлекеттік баждарды төлеуге тиіс. Тіркеудің жалпы құны рәсімге байланысты 983-ден 5 505 теңгеге дейін болады.

ШҚО-ның басқа аудандарында тұратындар өз көлік құралдарын тексеру және тіркеу үшін Алтай және Риддер қалаларында, сондай-ақ Зайсан және Шемонаиха аудандарында орналасқан арнайы ХҚКО-ларға жеткізуі қажет.

Сонымен қатар 2025 жылғы 5 сәуірден бастап мопедтерді, мотоциклдерді және белгілі бір сипаттамалары бар басқа да көлік құралдарын басқару үшін «А1» санатындағы жүргізуші куәлігі қажет болады. Бұл куәлікті алу үшін ең төменгі жас 16 жас болып белгіленген, ал оқу мерзімі автомектепте 55 күнді құрайды. «А» санатындағы жүргізуші куәлігі бар жүргізушілер куәлігін ауыстырған кезде автоматты түрде «А1» кіші санатын алады.

Сондай-ақ тіркелмеген мопедті басқару немесе жүргізуші куәлігінсіз жүру үшін 20 айлық есептік көрсеткішке дейін айыппұл салынатынын есте сақтау маңызды. Сондықтан мопед иелері жаңа ережелер күшіне енгенге дейін көлігін тіркеп, қажетті жүргізуші куәлігін алып үлгеруге тиіс.

Алдағы өзгерістерге байланысты мопед иелері тіркеу, оқыту және жүргізуші куәлігін алу қажеттілігіне қазірден бастап назар аударуға тиіс. Бұл оларды әкімшілік жауапкершіліктен сақтап, көлікті жаңа заңнамаға сәйкес басқаруға мүмкіндік береді.

Фото: Жібек Нұрахмет