ШҚО қылмыстық істер жөніндегі мамандандырылған ауданаралық сотының үкімімен екі Латвия азаматы Қазақстан Республикасы Қылмыстық кодексінің 297-бабы 1-бөлігі 3-тармағының 1,3-тармақшалары бойынша кінәлі деп танылып, 11 жылға бас бостандығынан айыру жазасына кесілді, деп хабарлайды Altainews.kz тілшісі ШҚО Прокуратурасының баспасөз қызметіне сілтеме жасап.

Бұған дейін 2024 жылғы шілдеде облыс прокуратурасы ҰҚК ШҚО бойынша департаменті қадағалау органының үйлестіруімен синтетикалық есірткі өндіруге арналған жасырын зертхананы анықтағаны туралы хабарлаған болатын.

Еске сала кетсек, тінту барысында 125 кг мефедрон (630 мың бірреттік доза), 500 литр прекурсорлар және тәулігіне 30 кг синтетикалық есірткі өндіруге мүмкіндік беретін жаңа буынды зертханалық жабдық тәркіленген.

Тәркіленген есірткінің қара нарықтағы құны 3,5 миллиард теңгеден асады.

Қылмыстық іс сотта 3 ай бойы қаралды. Сот процесі барысында айыпталушылардың кінәсі толық дәлелденіп, мемлекеттік айыптаушы соттан 11 жыл бас бостандығынан айыру жазасын тағайындауға бағдар берді.

Сотталғандар жазасын орташа қауіпсіздік деңгейіндегі түзеу мекемесінде өтейді. Сот үкімі заңды күшіне енген жоқ.

 Ержан Әбіш