Көктемгі жел екпіндеп, күн қызуы күшейгенде, жазық далада жыл сайынғы құбылыс – қамыс пен қураған шөптің тұтанатыны жаңалық емес. Мұндай кезде адамның әрекеті мен табиғи құбылыстың үндестігі сынға түседі. Зайсан ауданындағы Шұбырағаш аумағында тіркелген табиғи жану дерегі дәл осы үндестікті тағы бір мәрте дәлелдеді. Жергілікті билік пен төтенше жағдайлар қызметі бірлесіп, әуеден сөндіруге МИ-8 тікұшағын, ал оқиға орнына 85 адам мен 15 техниканы жұмылдырды, деп хабарлайды Altaіnews.kz тілшісі.

Қамыс пен құрғақ шөптің жануы туралы хабар түскен сәттен бастап, тиісті қызметтер жедел әрекетке көшті. Облыс әкімі Нұрымбет Сақтағановтың тапсырмасымен өртті сөндіруге қолда бар барлық ресурстар жұмсалды. Өрт ошағы батпақты және техникамен жету қиын жерде орналасқанымен, жауапты мамандар өз жұмысына дереу кірісті. Қазір оқиға орнында Төтенше жағдайлар департаменті, орман шаруашылығы және жергілікті атқарушы органдар жұмыла әрекет етуде. Барлығы 85 адам мен 15 арнайы техника тілсіз жаумен күреске тартылған. Олардың қатарында су таситын көліктер, соқалы трактор мен жүк тиегіш те бар.

Әуеден сөндіру жұмыстары да ұйымдастырылып үлгерді. Ми-8 тікұшағы іске қосылып, бортындағы 11 құтқарушы қажетті жабдықтармен шұғыл әрекет етуде. Арнайы жанармай тасымалдау көлігі де бағыт алды, бұл тікұшақтың үздіксіз жұмысын қамтамасыз етпек.

Көктемгі дала желі бұл жолы да өзінше күш сынасып тұр. Желдің қазіргі сәттегі жылдамдығы секундына 19-20 метрге жетіп, отты ауыздықтауды қиындатып жатқаны рас. Десе де, жағдай толық бақылауға алынып отыр. Төтенше жағдайлар қызметі өрттің таралуына жол бермей, тиісті шараларды қатаң сақтауда.

Жалпы, өңір үшін мұндай оқиғалар таңсық емес. Сондықтан да, мамандар айтуынша, табиғаттың осы бір тосын мінезіне тосырқамай, салқынқандылық танытқан жөн. Ең бастысы - сақтық шараларын естен шығармай, әр азаматтың ортақ жауапкершілікті сезіне білуінде. Өйткені табиғатпен тіл табысу - тек мамандардың ғана емес, барша жұрттың ортақ міндеті.