2025 жылғы 16 сәуір күні сағат 14:30-да республикалық маңызы бар «Өскемен – Алтай – Үлкен Нарын – Катонқарағай – Рахман қайнары» автожолының 56-шақырымында барлық көлік түрлеріне арналған қозғалыс толық қалпына келтірілді. Бұл туралы «ҚазАвтоЖол» ҰК» АҚ ШҚО филиалының баспасөз қызметі мәлімдеді, деп хабарлайды Altainews.kz тілшісі.

Естеріңізге сала кетсек, 15 сәуір күні кешкі сағат 20:00 шамасында аталған жол учаскесінде жол жиегінің шайылуы тіркеліп, қауіпсіздік мақсатында 6–166 шақырым аралығындағы жол бөлігінде көлік қозғалысына уақытша шектеу енгізілген болатын.

Мамандардың мәлімдеуінше, бұл учаске су тасқыны жиі тіркелетін қауіпті аймаққа жатпайды. Мұнда су өткізу құбырлары жоқ, осыған дейін тасқын қаупі байқалмаған.

Орын алған жағдайды жоюға «КАЖсервис» ЖШС ШҚО филиалы мен «Kurylys Group RK» ЖШС мердігер компаниясының мамандары бірлесіп жұмылды. Бар болғаны 16 сағат ішінде жол жабыны толық қалпына келтірілді. Құтқару және қалпына келтіру жұмыстарына 22 техника бірлігі мен 30 адам қатыстырылды. Жол бөлігін нығайту үшін 4000 тонна тау жынысы төселді.

Қазіргі уақытта жолдағы қозғалыс толық қалыпқа келтірілді. Барлық бағыттар бойынша көлік қатынасы штаттық режимде жүзеге асуда.