Шығыс Қазақстан облыстық А.С. Пушкин атындағы кітапханада «Күршімнен жеткен күмбір үн» атты шығармашылық кездесу өтті, деп хабарлайды Altainews.kz тілшісі.

Кештің құрметті қонағы – ақын, журналист, айтыс сахнасының шебері Хасен Закария болды. Өнер жолын 1990-жылдары айтыскер ақын ретінде бастаған ол республикалық деңгейде кеңінен танымал болды.

Соңғы жылдары Хасен Закария жазба поэзияға ден қойып, өзіне тән қоңыр үнімен терең әрі мағыналы жырларымен оқырман жүрегін жаулап жүр. Оның өлеңдеріне марқұм сазгер Оралхан Көшеров ән жазған. Белгілі әнші Жанар Айжанова орындайтын, көпшілікке кең таралған «Достарға» әнінің сөзін де Хасен ақын жазған.

Ақын ұзақ жылдар бойы облыстық «Дидар» газетінің меншікті тілшісі ретінде Күршім ауданынан репортаждар жазып, өңір тынысын жұртшылыққа жеткізіп келді.

Кеш барысында ақынның жерлестері, сыныптастары оның балалық шағы мен шығармашылық жолына қатысты естеліктерімен бөлісті. С.Аманжолов атындағы ШҚУ-дың І курс студенті, жас ақын Әли Ермеков сахнада жырдан шашу шашып, кеш иесінен бата алды.

Көпшілік ақынмен еркін сұхбат құрып, ән тыңдап, ерекше әсермен тарқасты.

Видео: Ермек Жиенбеков