Катонқарағайда өтіп жатқан фестиваль аясындағы халықтық спорт ойындарына қатысушы қала мен аудан саны 9-дан 13-ке дейін артты, деп хабарлайды  Altainews.kz тілшісі.

Ұлттық ат спорты түрлеріне деген қызығушылық жыл сайын артып келеді. Өткен жылы ойындарға облыстың небары 9 қаласы мен ауданы қатысса, биыл олардың саны 13-ке жетті.

Жарыстар «Алтай – түркі әлемінің алтын бесігі» халықаралық фестивалі аясында өтуде. Бағдарламада көкпар, аударыспақ, жамбы ату, теңге ілу сынды спорт түрлері қамтылған.

Қатысушылар бұл жарысқа ұзақ уақыт бойы тыңғылықты дайындалған. Өз ауданын лайықты таныту үшін бар күш-жігерін жарысқа жұмсауда.

Аударыспақ сайысында жеңімпаз атанған риддерлік Еркебұлан Төлеуханов былтыр Зайсан ауданында өткен жарыста жүлдесіз қалғанын, алайда биыл жүйелі әрі қажырлы жаттығудың арқасында жақсы нәтиже көрсеткенін мақтанышпен жеткізді.

Қатысушылар жарыс өтетін орынды да жоғары бағалады. Катонқарағайдың көркем табиғаты, асқақ таулары мен таза ауасы спортшыларға ұмытылмас әсер қалдырған.

Елизавета Седых

Фото: Жібек Нұрахмет