Шығыстағы батыр жандарға дауыс беріңіз: «Ізгі жүрек» байқауы басталды
Шығыс Қазақстанда ерлік пен мейірімге толы ерекше бастама жүріп жатыр. «Ізгі жүрек» атты қайырымдылық сыйлығы аясында ел үшін ерен іс жасаған жандардың есімі көпшілікке таныстырылып, жеңімпазды халықтың өзі анықтайды, деп хабарлайды Altainews.kz тілшісі.
Бұл игі жобаны ұйымдастырып отырған – «Қазцинк» компаниясы. Мақсат – қауіпті сәтте біреудің өмірін құтқарған, батырлық пен жанашырлық танытқан адамдарды елге үлгі ету.
Жоба аясында түрлі ерлік оқиғалары жиналды. Өрттен, судан, жол апатынан адам құтқарғандар – әртүрлі жастағы, әртүрлі маман иелері. Алайда бәрін біріктіретін ортақ қасиет – нағыз адамдық пен жүректілік.
- Биылғы жылы Шығыс Қазақстан облысынан алты азамат «Ізгі жүрек» номинациясына іріктеліп алынды. Қазір онлайн дауыс беру жүріп жатыр. Сіз де 16 маусым мен 7 шілде аралығында izgi-jurek.kz сайтына кіріп, жүрек жылуын сыйлаған қаһарманға дауыс бере аласыз. Ең көп дауыс жинаған қатысушыға – 1 000 000 теңге көлемінде ақшалай сыйақы табысталады. Егер ерлік бірнеше адамнан құралған ұжым тарапынан жасалса, жүлде теңдей бөлінеді. Жеңімпаздар Металлургтер күніне орай өтетін салтанатты шарада марапатталады. Бұл – біз үшін үлгі боларлық, алғыс пен құрметке лайық азаматтарды танудың таптырмас мүмкіндігі. Сайтқа кіріп, батырларды қолдаңыз – izgi-jurek.kz, - делінген ресми хабарламада.
Оқи отырыңыз
