2023 жылдың соңында Мемлекет басшысының Жарлығымен жеке аудан болып құрылған Марқакөлде бүгінде бірқатар жаңа бастамалар жүзеге асып жатыр. Ауданның 2025 жылғы алғашқы алты айындағы әлеуметтік-экономикалық даму қорытындысы бойынша барлық салада оң өсім байқалады, деп хабарлайды Altainews.kz тілшісі.

Бұл туралы Өңірлік коммуникациялар қызметінде өткен брифингте Марқакөл ауданы әкімінің міндетін уақытша атқарушы Нұрсұлтан Бейсенов мәлімдеді. Спикердің айтуынша, 2024 жылдың осы кезеңімен салыстырғанда:

• ет өндірісі – 14,5%-ға,
• сүт өндірісі – 22,4%-ға,
• жұмыртқа өндірісі – 11,6%-ға артқан.

Сондай-ақ мал басы да өскен:

• ірі қара мал – 44,1%-ға,
• ұсақ мал – 6%-ға,
• жылқы – 5%-ға көбейген.

Өңдеу өнеркәсібінің өсімі жарты жыл ішінде 119,3%-ды құраған. Бұл – аудандағы экономикалық белсенділіктің артқанын көрсетеді.

Сонымен қатар, биыл ақпан айында «MARKAKOL LODGE» демалыс базасының жобасы «ШҚО-ның үздік рекреациялық аймағы» байқауында жеңімпаз атанып, ауданға инфрақұрылымды дамыту үшін 200 млн теңге қаржы тартылды.

Жарты жыл ішіндегі бұл жетістіктер Марқакөлдің әлеуеті жоғары екенін көрсетіп отыр.