Шығыс Қазақстан облысында 2025 жылға арналған тұрғын үй бағдарламаларын іске асыру аясында жалдамалы пәтерлерді сатып алу жұмыстары жүргізілуде. Бұл туралы облыстық құрылыс, сәулет және қала құрылысы басқармасының басшысы Руфат Акрамов облыс әкімдігінің отырысында мәлім етті, деп хабарлайды Altainews.kz тілшісі.

Жыл соңына дейін өңір бойынша жалпы ауданы 40 мың шаршы метрді құрайтын 539 отбасыға тұрғын үй берілмек. Оның ішінде 229 пәтер көпбалалы отбасыларға, 310 пәтер әлеуметтік осал санаттағы тұрғындарға тиесілі болады.

Бағдарламаға арналған қаржы бірнеше көзден бөлінуде: республикалық бюджеттен – 2,7 млрд теңге, мемлекеттік бағалы қағаздар шығару арқылы – 6,1 млрд теңге, облыстық бюджеттен – 0,5 млрд теңге.

Сонымен қатар жергілікті бюджет есебінен 2,6 млрд теңге көлемінде қосымша қаржыландыру қарастырылған. Оның жартысы «Бірқабатты Шығыс» жобасы бойынша тұрғын үй құрылысына, ал қалғаны көпқабатты үйлердегі пәтерлерді сатып алуға жұмсалады.

Жалдамалы пәтерлерді сатып алу Өскемен, Зайсан, Глубокое және Самар аудандарында жүргізіледі. Бұл өңірлерде 189 пәтер көпқабатты үйлерден беріледі. Ал Риддер қаласы мен облыстың 11 ауданында «Бірқабатты Шығыс» жобасы аясында жеке тұрғын үйлер салынып, 350 пәтер беріледі.
Алайда жобаны іске асыру барысында бірқатар қиындықтар да туындаған. «Бірқабатты Шығыс» аясында жоспарланған 350 тұрғын үйдің 304-інің ғана құрылысы басталған. Қалған 46 үйдің құрылысы әлі қолға алынбаған. Артта қалып жатқан өңірлер қатарында Алтай ауданы (4 үй), Ұлан ауданы (38 үй) және Үлкен Нарын ауданы (4 үй) бар.

Жалпы, 2025 жылдың алғашқы алты айында бағдарлама аясында жалпы ауданы 800 шаршы метр болатын 11 пәтер пайдалануға берілді. Бұл пәтерлер республикалық бюджет есебінен Зайсан (6 пәтер) және Күршім (5 пәтер) аудандарында сатып алынған. Сонымен қатар Глубокое ауданында тағы 6 пәтердің (500 шаршы метр) құрылысы аяқталуға жақын, олар жақын арада тапсырылады.

Нұрымбет Сақтағанов кейбір аудандардағы кешігулерге алаңдаушылық білдіріп, жобалардың орындалуын қатаң бақылауға алуды тапсырды. Әкім тұрғын үйге аса мұқтаж әлеуметтік осал топтарға баспана беру мерзімінің маңызын ерекше атап өтті.

Жалға берілетін пәтерлерді сатып алу бағдарламасы мен «Бірқабатты Шығыс» жобасы – ауылдық аумақтар мен өңірлік орталықтарда тұратын тұрғындарды қолжетімді баспанамен қамтуға бағытталған мемлекеттік саясаттың бір бөлігі. Шығыс Қазақстан бұл бастамаларды іске асыруда белсенділік танытып отыр. Алайда нақты нәтижеге қол жеткізу үшін тек қаржыландыру ғана емес, сондай-ақ жергілікті жерлерде жүйелі жұмыс қажет.

Дамир Омаров

Видео: Евгений Щетников