«ҚазАвтоЖол» ұлттық компаниясы еліміздегі автобандарда қолданыстағы ережелер мен тыйымдарға қатысты барлық жүргізушілерге ресми ескерту таратты, деп хабарлайды Altainews.kz тілшісі.

Көлік ағынының артуы мен жоғары жылдамдықтағы жолдардың ұзақтығы көбейіп жатқан жағдайда «ҚазАвтоЖол» жүргізушілерді қауіпсіздік талаптарын сақтап, автобандарды қарапайым жолдармен шатастырмауға шақырады.

Қазақстандағы автобандар жоғары жылдамдықпен қозғалу үшін арналған және ерекше мәртебеге ие. Сондықтан ҚР Жол қозғалысы ережелері (ЖҚЕ) мұндай жол учаскелеріне қатысты арнайы нормаларды бекіткен. Бұл талаптарды сақтамау тек айыппұл ғана емес, өмірге қауіп төндіруі мүмкін.

Автобанда қатаң тыйым салынған әрекеттер: Жаяу жүргіншілер мен жануарларға кіруге тыйым салынады: автобан – серуендеуге арналған жер емес. Көлік құралынсыз жолда болуға – жаяу жүргіншілерге де, үй жануарларына да рұқсат жоқ.

Баяу қозғалатын көліктер кіре алмайды: велосипедтер, мопедтер, тракторлар, өздігінен жүретін машиналар және техникалық төлқұжат бойынша немесе нақты жағдайына байланысты жылдамдығы 40 км/сағ-тан төмен кез келген көлік автобанға жіберілмейді.

Жүк көліктеріне – тек екінші жолаққа дейін: жалпы салмағы 3,5 тоннадан асатын жүк көліктеріне үшінші және одан кейінгі жолақтармен жүруге тыйым салынған. Бұл кептелістердің алдын алу және қауіпсіз басып озуды қамтамасыз ету үшін қажет.

Тоқтау – тек арнайы белгіленген жерлерде: көлікті тек 5.15 немесе 6.11 белгілерімен көрсетілген арнайы алаңдарда ғана тоқтатуға болады. Басқа кез келген жерде – тіпті қысқа уақытқа да бұл ЖҚЕ бұзушылығы болып саналады.

Бұрылуға және жолақ арасындағы ашық бөліктермен өтуге тыйым салынады: автобанның ортасындағы техникалық ашық жолақтарды бұрылу үшін пайдалану – айыппұлмен қатар, өмірге де қауіп төндіретін заңбұзушылық.

Артқа жүруге мүлдем тыйым салынған: автобанда артқа жүру ауыр бұзушылық болып саналады.

Автобандарда жаттығу жүргізуге болмайды: жүргізуді үйрену сабақтарын мұндай жолдарда өткізуге мүлдем болмайды.

Егер шұғыл жағдайда (бұзылу, апат және т.б.) тоқтау қажет болса, «ҚазАвтоЖол» келесі тәртіппен әрекет етуді ұсынады: авариялық жарық сигналын қосып, апатты тоқтау белгісін орнатыңыз; мүмкіндік болса жолдың шетіне немесе арнайы шұғыл жолаққа өтіңіз.

Жоғарыда аталған ережелер тек ресми автобан мәртебесі бар жолдарда ғана емес, 5.3 «Автомагистраль» жол белгісі орнатылған кез келген жолда қолданылады. Яғни, физикалық жолақ бөлу болмаса да, егер бұл белгі тұрса, барлық шектеулер мен тыйымдар күшінде болады.

Сапар алдында қарапайым кеңестер: көлігіңіздің техникалық жағдайын тексеріңіз; көлігіңіздің 40 км/сағ жылдамдықтан төмен емес қозғала алатынына көз жеткізіңіз; жол белгілері мен таңбаларымен алдын ала танысып алыңыз; егер сіз жүк көлігін жүргізсеңіз – қозғалыс жолағына ерекше назар аударыңыз.

«ҚазАвтоЖол» компаниясы еске салады: автобандарда ЖҚЕ қатаң сақтау – жай формалдық емес, елдің негізгі көлік артерияларымен қауіпсіз әрі жайлы жүрудің кепілі.

Дамир Омаров