Шығыс Қазақстан облысында мектеп пен колледж оқушылары арасында ерекше форматтағы байқау өтті. Облыс прокуратурасының бастамасымен ұйымдастырылған "Мен және Заң" атты шара жастардың құқықтық сауатын арттыруға бағытталған, деп хабарлайды Altainews.kz тілшісі.

Бұл байқау – жай жарыс емес, үлкен ағартушылық іс-шара. Оған облыстың барлық өңірінен келген 14 команда қатысты. Жалпы саны – 200-ге жуық оқушы. Байқаудың басты мақсаты – жастарды заңға құрметпен қарауға үйретіп, құқықтық мәдениетін дамыту.

Шараның ерекшелігі – қатысушылар өздерінің ойларын тек сөзбен емес, сахналық қойылым арқылы жеткізді. Олар қазіргі қоғамда өзекті болып тұрған мәселелерді — буллинг, есірткі тарату, алаяқтық, отбасындағы зорлық-зомбылық, экологиялық құқық бұзушылықтар және көше қылмыстары секілді тақырыптарды қозғады.

Әр көрініс заңға немқұрайлы қараудың қандай ауыр салдарға апаратынын көрсетті. Жастар өз өнері арқылы қоғамға ой салып, әр адамның өмірінде заң мен тәртіптің маңызы зор екенін жеткізді.

Байқау нәтижесінде үздік деп танылғандар:

• 3-орын – Глубокое ауданынан келген «Жол сақшылары» командасы;

• 2-орын – Өскемен қаласының «Құқықтық патруль» командасы;

• Бас жүлде – Ұлан ауданынан келген «Ер-Қасым» командасына бұйырды.

Жеңімпаздар алғыс хаттармен, кубоктармен және ақшалай сыйлықтармен марапатталды. Қалған командаларға да арнайы номинациялар беріліп, теннис үстелдері мен басқа да спорттық жабдықтар сыйға тартылды.

Бұл шара жастар арасында құқықтық сауаттылықты арттырып қана қоймай, олардың қоғамдағы өзекті мәселелерге бей-жай қарамайтынын көрсетті. Ұйымдастырушылар мұндай байқаулар алдағы уақытта да жалғасатынын атап өтті.