Бүгін Өскеменде «Қазақстанның экспорттық-кредиттік агенттігі» АҚ өкілдері жергілікті кәсіпкерлерге арналған семинар өткізді. Шараға агроөнеркәсіп, жеңіл және тамақ өнеркәсібі салаларындағы өндірушілер қатысты, деп хабарлайды Altainews.kz тілшісі. 

Семинар барысында кәсіпкерлерге ЭКА ұсынатын қолдау шаралары, цифрлық платформалар мен экспорттық операцияларға кепілдік беру механизмдері таныстырылды. Жиында ЭКА-ның өңірлік менеджері Алтынгүл Төлегенова агенттіктің қызмет түрлері туралы баяндап, экспорттық операцияларға кепілдік беру және «Экспорттаушының жеке кабинеті» платформасына ерекше назар аударды. Жаңа цифрлық шешімдер кәсіпкерлерге өтінім беру мен шарт жасасу процесін онлайн режимде жүргізуге мүмкіндік береді.

Қазіргі уақытта Шығыс Қазақстан облысы сақтандыру өтемі мен кепілдіктер көлемі бойынша еліміздегі үш ірі өңірдің қатарына енді. Өткен жылы ЭКА оннан астам жергілікті компанияға сыртқы нарықта орнығып, тұрақтануға қолдау көрсетті. 2024 жылы агенттіктің қолдауымен облыста 62 млрд теңгеден астам қаржыға жобалар жүзеге асты.

Өңірлік кәсіпкерлерге арналған семинарда жылдық мөлшерлемесі 12,6%-дан аспайтын экспорт алдындағы қаржыландыру механизмі кеңінен талқыланды. Бұл қолдау шарасы – шикізат сатып алу және өнімнің экспорттық партияларын дайындау үшін айналым қаражатын қамтамасыз етуге бағытталған.

Кәсіпкерлер семинарда сауданы қаржыландыру, несиелік тәуекелдерді сақтандыру, төлемдерді кейінге қалдыру, сондай-ақ халықаралық байқаулар мен келісімшарттар бойынша әртүрлі кепілдіктер туралы ақпарат алды.

Агенттік өкілдерінің айтуынша, ағымдағы жылдың алғашқы жартыжылдығында компания 333 млрд теңгеден астам қаржылай қолдау көрсеткен. Жыл соңына қарай бұл көрсеткіш 600 млрд теңгеге жетуі мүмкін.

Фото/видео: Жалғас Сақадиев