2024 жылдан бастап Қазақстанда экспорттық қызметпен айналысатын компаниялар үшін қосылған құн салығын (ҚҚС) қайтару процесі айтарлықтай жеңілдетілді. Бұл өзгерістер жалпы қайтару тәртібіне ғана емес, сондай-ақ цифрлық теңге негізінде енгізілген жаңа пилоттық жобаға да қатысты. Бұл туралы ШҚО Мемлекеттік кірістер департаменті басшысының орынбасары Қазыбек Қойшинов Өңірлік коммуникациялар қызметінде өткен брифинг барысында мәлімдеді,- деп хабарлайды Altainews.kz тілшісі.

ҚҚС қайтару жеңілдіктері экспорттық қызметті жүзеге асыратын компанияларға қолданылады, егер олардың нөлдік ставкамен салық салынатын тауарларды сату үлесі жалпы айналымның кемінде 70%-ын құраса. Бұл жаңашылдық экспорттық саудамен белсенді айналысатын компанияларға ҚҚС артықшылығын қайтаруға мүмкіндік береді. Сонымен қатар, олардың тұрақты экспорттық операциялары болуы да маңызды.

Осы талаптарға сай келетін салық төлеушілер үшін ҚҚС қайтару 15 жұмыс күні ішінде жеңілдетілген тәртіппен жүзеге асырылады. Алайда, мұндай жеңілдік тек салық мониторингінде тұрған немесе өз өндірісінің тауарларын экспорттайтын компанияларға ғана қолданылады.

ҚҚС қайтару процесін одан әрі жеделдету мақсатында «Цифрлық ҚҚС» пилоттық жобасы іске қосылды. Бұл жоба цифрлық теңгені пайдалану арқылы ҚҚС қайтаруды тездетуге бағытталған.

Жоба аясында цифрлық теңге тек ҚҚС бойынша есеп айырысу үшін қолданылады және оны қолма-қол ақшаға айналдыру мүмкін емес. Бұл қайтару процесін 15 жұмыс күніне дейін қысқартуға мүмкіндік беріп, қосымша тексерулерді қажет етпейді.

Жанама салықтарды әкімшілендіру басқармасының басшысы Асхат Жибитаевтың айтуынша, цифрлық теңге арқылы жүргізілген барлық транзакциялар Ұлттық банкке және салық органдарына жіберіледі, бұл қаржы ағындарының ашықтығын қамтамасыз етіп, ҚҚС-тан жалтару тәуекелдерін төмендетеді.

«Цифрлық ҚҚС» пилоттық жобасы 2025 жылдың соңына дейін жалғасады. Оған ерікті түрде қатысу мүмкіндігі қарастырылған. Экспорттаушылар мен кәсіпкерлер үшін бұл бастама ҚҚС қайтару мерзімдерін қысқартып, салық жүйесіне деген сенімділікті арттыруға жаңа мүмкіндіктер ашады.