Шығыс Қазақстан облысының тұрғыны Ертіс жағасынан екі бірдей ителгі ұстап алған, деп хабарлайды Алтайньюс тілшісі.

Өскемендегі №2 соттың мәлімдеуінше, бұл оқиға қазан айында болған. Қала тұрғыны қызыл кітапқа енген құстарды қолға түсіріп, үйінде ұстаған. Сирек кездесетін, тіпті құрып кетудің аз-ақ алдында тұрған қанаттыларды заңсыз олжалағаны үшін ер азамат жауапкершілікке тартылды.  

– Оған қатысты қылмыстық кодекстің 339-бабының 1-бөлігі бойынша қылмыстық іс қаралды. Сот дәлелдемелерді зерттеп, сотталушының кінәсі толық дәлелденді деп есептеді. Жаза тағайындау кезінде сотталушының кінәсін мойындағаны, жасаған ісіне өкінетіні ескерілді, – деп мәлімдеді №2 соттың баспасөз қызметі.

Сот шешімімен айыпталушының бас бостандығы шектелді.