ШҚО-да сәулелік диагностикалаудың инновациялық әдістері қолданылады
Өткен жылы облыста колоректальды қатерлі ісіктің 245 жаңа жағдайы анықталды. Обырдың бұл түрі тек Шығыс Қазақстанда ғана емес, бүкіл әлемде жетекші онкологиялық патологиялардың бірі. Облыстық онкологиялық орталықта диагностиканың сәулелік инновациялық әдістері – виртуалды колоноскопия және МРТ-энтерография кеңінен қолданылады, деп хабарлайды Altainews.kz тілшісі.
ШҚО көпсалалы онкология және хирургия орталығының сәулелік диагностика бөлімінің меңгерушісі Малика Мейрманова атап өткендей, қатерлі ісіктермен күресте ерте анықтау шешуші рөл атқарады.
Орталықтың баспасөз қызметінің хабарлауынша, ШҚО көпсалалы онкология және хирургия орталығы медициналық қызметтің осы түрін Қазақстанда алғашқылардың бірі болып енгізді. Бұл 2018 жылы клиникаға 128 бөлімді КТ аппараты орнатылуымен байланысты. Айта кетейік, 2023 жылдан бастап онкологиялық орталықта 50-ге жуық науқас виртуалды колоноскопияның көмегімен тексерілді.
МРТ энтерографиясының көмегімен мамандар ащы ішекті зерттейді. Бұл органның анатомиялық орналасуы кең таралған әдістермен диагноз қоюға келмейді. Жіңішке ішектің ісіктері өте сирек кездесетін құбылыс болғанына қарамастан, мұндай жағдайлар кездеседі. Зерттеудің бұл әдісі онкологиялық орталықта ТМД елдерінде баламасы жоқ 3,0 Тесла МРТ аппаратын сатып алғаннан бастап енгізілді. Оның магнит өрісінің қуаты мен арналардың саны онкологиялық ісіктердің тіпті ұсақ бөлшектерін ажыратуға мүмкіндік береді.