Бүгін ШҚО көпсалалы онкология және хирургия орталығында ішек пен әйел жыныс мүшелерінің қатерлі ісіктері туралы хабардар болу айлығына арналған ашық есік күні өтті, деп хабарлайды Altainews.kz тілшісі.

Сағат 09.00-ден 13.00-ге дейін облыс тұрғындары терапевтің жолдамасынсыз және МӘМС жүйесіндегі мәртебесіне қарамастан білікті онкологтардың кеңестерін алып, көрсеткіштер бойынша қажетті тексерулерден өтті. Орталыққа бұл күні барлығы 130-дан астам адам қатысты.

Колоректальді қатерлі ісік - Шығыс Қазақстандағы жетекші онкологиялық патологиялардың бірі. Анықталған жағдайлардың саны бойынша қатерлі ісік ауруларының барлық түрлерінің ішінде үшінші орында. Мәселен, 2023 жылы өңірде ішектің қатерлі ісіктерінің 245 жаңа жағдайы тіркелді. Сондықтан онкологтар әрдайым халықты ашық есік күндеріне, кәсіби тексерулер мен скринингтерге келуге шақырады.