KZ
Өскемен
+9°
ясно жел 0,7 м/с, З
446.49 475.38 4.79

Обырды анықтауда диагностиканың озық әдістерін қолданады - ШҚО



27.03.2024, 16:08 71 0 Айна Ескенқызы

Колоректальды (тоқ ішектің) қатерлі ісіктің алдын алу  және оны ерте анықтау өте маңызды. Өйткені обырдың бұл түрі Қазақстанда жетекші онкологиялық патологиялардың бірі болып қала береді.

Жыл сайын елде үш мыңнан астам жаңа жағдай тіркеледі. Диагноз негізінен 50 жастан асқан адамдарға қойылады. Әйелдерде қатерлі ісіктің бұл түрі ерлерге қарағанда біршама сирек кездеседі. 2023 жылы Шығыс Қазақстан облысында тоқ ішектің қатерлі ісігінің 245 жағдайы тіркелген, олардың 171-сі ерте сатысында анықталды, деп хабарлайды Altainews.kz тілшісі.

Облыстық көпсалалы онкология және онкология орталығының жетекші онколог мамандары ішек қатерлі ісігі туралы хабардар болу айлығы аясында онкологиялық орталықта қолданылатын колоректальды обырды диагностикалау мен емдеудің жаңа әдістері туралы айтып берді.

- Қазақстанда обырдың бұл түрін ерте анықтау Ұлттық скринингтік бағдарламаға енгізілген. Тексеру кезінде тек қатерлі ісік қана емес, сонымен қатар осы органның созылмалы аурулары да анықталады. Алғашқы стадиясында белгілі болған обырды емдеуде қазір көптеген заманауи технологиялар бар. 2018 жылдан бастап біз елімізде алғашқылардың бірі болып виртуалды колоноскопия әдісін қолданып келеміз. 2017 жылы онкоорталық 128 тілікті  КТ аппаратына қол жеткізген болатын. Осы озық аппаратта арнайы бағдарламаның көмегімен  ішек эндоскоп арқылы қаралады. Ішекке ешқандай аспап енгізілмейді, бірақ органның ішінде жүргендей, виртуалды түрде  ішектің қатпар-қатпарына дейін көрініп тұрады. Диагностиканың бұл түрі бүгінгі таңда ең озық әдіс болып табылады, - дейді орталықтың директоры Гүлмира Сағидуллина.

Тоқ ішек обырын анықтаудың алғашқы кезеңі – скринингтік тексеру кезінде  пациенттер гемокульт-тест тапсырады. Егер оның нәтижесі оң болса, науқас одан әрі тексеруге жіберіледі. Ең алдымен, бұл - колоноскопия және биопсия. Алайда колоноскопия – аса жағымсыз процедура. Сол себепті кейбір пациенттер бұл зерттеуден үзілді-кесілді бас тартады екен, тіпті қолхат жазып беруге дейін барған.  Қазір облыстық көпсалалы онкология және хирургия орталығында колоноскопия ауыруды басатын препараттарды (седация) қолдана отырып жүргізіледі, яғни процедура пациенттер үшін әлдеқайда жеңіл өтеді. 2023 жылы өңірде колоноскопия әдісімен 947 зерттеу жүргізілсе, 46 пациент седативті препараттарды қолданған. 2023 жылдың 12 айында колоректальды қатерлі ісік скринингімен өңір тұрғындарының 96,1% қамтылды. 1148 адамның гемокульт-тестінде оң нәтиже байқалды, қатерлі ісіктің 32 жаңа жағдайы анықталды.

Онкологиялық орталықтың озық заманауи құралдармен жабдықталуымен қатар мұндағы мамандардың біліктілігін арттыруға да ерекше мән беріліп келеді. Орталықтағы 70 дәрігердің 51-і шетелде білімдерін жетілдірген.

 

Біздің Instagram парақшамызға жазылыңыз

Жаңалықтарды ең бірінші болып оқыңыз

жазылу

Пікірлер (0)

Кликните на изображение чтобы обновить код, если он неразборчив